உலகமே ஒரு விளையாட்டு !

Udayakumar Nalinasekaren
Jan 01, 2011

கடேந்திர நாதர் என்ற விளையாட்டுச் சித்தர் பாடியிருக்கும் சித்தர் பாடலில் இருந்து ஒரு பகுதி

தாய்தந்தை கூடுவதும் விளையாட்டே - பூவில்
தநயனாய் வந்ததுவும் விளையாட்டே
மாயையாய் வளர்ந்ததும் விளையாட்டே - பத்து
வயது தெரிந்ததுவும் விளையாட்டே

பெற்றபிள்ளை என்றதுவும் விளையாட்டே - தந்தை
பேரிட் டழைத்ததுவும் விளையாட்டே
மற்றதை யுணர்வதுவும் விளையாட்டே - இந்த
வையகத்து இருப்பதுவும் விளையாட்டே

பெண்டுபிள்ளை யென்பதுவும் விளையாட்டே - எங்கும்
பேரோங்க வாழ்வதும் விளையாட்டே
கண்டு பொருள் தேடுவதும் விளையாட்டே - பணம்
காசுவட்டி போடுவதும் விளையாட்டே

மாடிமனை வீடுவாசல் விளையாட்டே - என்றன்
மனைவிமக்கள் என்பதுவும் விளையாட்டே
தேடிவைத்த பொருளெல்லாம் விளையாட்டே- இச்
செகத்திற் திரிவதுவும் விளையாட்டே

ஆடுமாடு தேடுவதும் விளையாட்டே - சதுர்வேத
ஆகமநூ லாய்வதுவும் விளையாட்டே
கூடுவிட்டுப் போகுமுயிர் விளையாட்டே- உற்றார்
கூடி மகிழப் பேசுவதும் விளையாட்டே

பிணமா யிருப்பதுவும் விளையாட்டே- அதைப்
பெற்றோர்கண் டழுவதும் விளையாட்டே
குணமாய்க் கழுவியதும் விளையாட்டே - ஈமங்
கொண்டுபோய்ச் சுட்டதுவும் விளையாட்டே

செத்தோர்க்கு அழுவதுவும் விளையாட்டே- சுடலை
சேரும் வரை அழுவதும் விளையாட்டே
மெத்தஞானம் பேசுவதும் விளையாட்டே - குளித்து
வீடுவந்து மறப்பதுவும் விளையாட்டே

வீணாள் கழிவதுவும் விளையாட்டே - சுடலை
சேரும் வரை அழுவதும் விளையாட்டே
மெத்தஞானம் பேசுவதும் விளையாட்டே - குளித்து
வீடுவந்து மறப்பதுவும் விளையாட்டே

கனவுநினைவு என்பதுவும் விளையாட்டே - இக்
காசினியோர் உழல்வதும் விளையாட்டே
நினைவாய்ச்செய் வஞ்சகமும் விளையாட்டே - மிக்க
நிதிநிலம் பெண்ணென்பதும் விளையாட்டே

பெண்ணாசை யென்பதுவும் விளையாட்டே - அவர்
பின்னால் திரிவதுவும் விளையாட்டே
மண்ணாசை யென்பதுவும் விளையாட்டே - நல்ல
வயல்தோட்டம் புஞ்சையெல்லாம் விளையாட்டே

சீராக வாழ்வதுவும் விளையாட்டே - செம்பொன்
சேகரித்து வைப்பதுவும் விளையாட்டே
நேராய்ப்பொய் சொலவதும் விளையாட்டே - நெஞ்சில்
நினைக்காமற் செய்வதுவும் விளையாட்டே

பந்துசனம் என்பதெல்லாம் விளையாட்டே - லோகப்
பற்றுடனே வாழ்வதுவும் விளையாட்டே
சொந்தநிதி தேடுவதும் விளையாட்டே- இதைச்
சொப்பனம்போ லெண்ணாததும் விளையாட்டே

யோகம்வந்து மகிழ்வதும் விளையாட்டே - அதன்
உண்மைதெரி யாததுவும் விளையாட்டே
சாகசஞ் செய்வதுவும் விளையாட்டே - ஒருவர்
தஞ்சமென்று நினைப்பதுவும் விளையாட்டே

கோடிப்பணந் தேடுவதும் விளையாட்டே - அதைக்
குழிவெட்டிப் புதைப்பதுவும் விளையாட்டே
தேடியலைவதும் விளையாட்டே - மனந்
தேறுதலாய் திரிவதும் விளையாட்டே ...

என்று இன்னமும் மேலே போய்க்கொண்டிருக்கிறது இந்த சித்தர் பாடல்